Layihənin məqsədi Azərbaycanın qədim dövlətçilik ənənələrini, mədəni irsini və tarixi şəxsiyyətlərini müasir kino dili ilə tamaşaçılara təqdim etməkdir. Film sənədli faktlarla bədii təxəyyülün vəhdətindən ibarət olacaq və milli kimliyin formalaşmasında mühüm mərhələləri əhatə edəcək.
Baş rollarda tanınmış aktyorlar Rüstəm Cəbrayılov və Ümid Qədimli çıxış edirlər. Ekran işində həmçinin Xalq artisti Vidadi Həsənov, eləcə də Duyğu Dəvəli, Səmimi Fərhad, Manaf Dadaşov, Rumiyə Ağayeva, Corc Qafarov və Nigar Qədirli kimi tanınmış simalar da rol alıblar.
Filmin quruluşçu rejissoru Elmar Bayramovdur. O, tarixi materiallara əsaslanaraq, emosional və vizual baxımdan təsirli ekran əsəri təqdim etməyi hədəfləyir.
Hazırda çəkilişlər Azərbaycanın bir neçə bölgəsində — tarixi abidələri və təbiət mənzərələri ilə seçilən məkanlarda aparılır. Layihə komandası bildirir ki, filmdə ən müasir texnoloji həllər və kino effektlərindən istifadə olunacaq. Bu da tamaşaçılara həm tarixi gerçəklikləri, həm də estetik baxımdan güclü vizual təcrübə yaşatmağa imkan verəcək.
Yeni film Azərbaycan tarixi mövzusunda milli kino irsinə yeni nəfəs gətirəcək və ölkəmizin mədəni təbliğatında mühüm rol oynayacaq.
