“Ermənistan daha öz təhlükəsizliyinin təminatçısı kimi Moskvaya arxalana bilməz”.
Bunu Ermənistanın Baş naziri Nikol Paşinyan “Politico” nəşrinə müsahibəsində deyib.
Onun sözlərinə görə, Ukraynadakı hadisələr nəticəsində Rusiyanın imkanları dəyişib: “Bu vəziyyətdə Ermənistanın strategiyası ölkənin digərlərindən asılılığını maksimum dərəcədə azaltmaqdır. Biz müstəqil ölkəyə sahib olmaq istəyirik, lakin bizim Qərb və Şərq, Şimal və Cənub arasında toqquşmaların mərkəzində qalmamaq üçün yollarımız olmalıdır. Ermənistan “proksi” ola bilməz. Bu, yolverilməzdir”.
Paşinyan, həmçinin müsahibəsində Azərbaycanın Qarabağ bölgəsində müvəqqəti yerləşdirilən rusiyalı sülhməramlıları öz missiyalarını yerinə yetirməməkdə ittiham edib: “Bununla belə, deyə bilmərəm ki, rusiyalı sülhməramlılar Qarabağda olmasaydı, vəziyyət daha yaxşı olardı”.
Xatırladaq ki, N.Paşinyan sentyabrın 2-si İtaliyanın “La Repubblica” qəzetinə müsahibəsində də Rusiyanın regiondakı roluna dair bir sıra fikirlər səsləndirib. Onun sözlərinə görə, sülhməramlılar öhdəliklərinə düşən vəzifələri icra etmirlər. O, eyni zamanda təhlükəsizlik sahəsində Rusiyadan asılı olmağı səhv adlandıraraq bildirib ki, Ermənistan strateji təhlükəsizliyini qurarkən tək Rusiyaya arxalanmamalı idi.
Bunun ardınca Rusiya XİN və Kreml Paşinyanın açıqlamalarına cavab verib.
